ROXAS CITY — Wala sang dapat nga kabalak-an ang mga himata sang Overseas Filipino Workers sa Qatar sa pagbugto diri sang diplomatic ties sang iban nga mga kapungsoran sa Middle East.
Mahibaluan nga ginbugto na sang mga kapungsoran sang Yemen, Maldives, Saudi Arabia, Bahrain, Egypt, United Arab Emirates kag Libya ang ila diplomatic ties sa Qatar bangud sa alegar pagsuporta sang pungsod sa mga terorista.
Sa interview sang Bombo Radyo kay Mr. Luis Salcedo, anay OFW sa Qatar kag nakabase na karun sa United Arab Emirates, indi sang apektado ang trabaho sang mga OFWs sa Qatar sa nasambit nga krisis.
Suno sa iya, ang mga nationals lamang sang iban nga pungsod sa Middle East ang ginapabiya sa Qatar kasubong nga ginapabiya man sa sini nga kapungsoran ang mga Qatari nationals.
Nahibaluan suno kay Salcedo nga ginhatagan na sang 14-diyas nga palaso sang UAE ang mga Qatari nationals sa ila pungsod nga maghalin ukon pangdakpon sila sang mga otoridad kag ipa-deport pabalik sa Qatar.
Apang aminado si Salcedo nga apektado karun ang biyahe sang mga eroplano halin kag padulong sa pungsod Qatar bangud ginkanselar na sang iban nga mga kapungsoran ang flights nga nagakonekta sa nasambit nga pungsod.
Ginpanginwala naman ni Salcedo nga may nagakahinabo karun nga panic buying sa Qatar bangud nagapabilin sa gihapon nga normal ang dalagan sang panggobyerno sa pungsod sa pihak sang tensyon.
Samtang wala sang kamatuoran suno kay Salcedo ang alegasyon nga ginasuportahan sang gobyerno sang Qatar ang mga terorista sa Middle East.
Suno kay Salcedo, nagpaguha na sang pahayag ang gobyerno sang Qatar nga nagapanginwala sa amo nga akusasyon.
Sa pagkamatuod suno sa iya, kabahin man ang Qatar sa koalisyon sang mga pungsod nga nagasuporta sa gobyerno sang Yemen nga nagapakig-away batuk sa terorista nga Al-Houthi.
Apang suno kay Salcedo nga may mga report nga may mga Qatari citizens gid man nga nagatipon sang pondo para sa mga terorista nga grupo.
Ginpahayag niya nga sumugod pa sadtong 1990s nga may nagatuhaw nga report nga may mga Qatari nga nagasuporta sa mga terorista.
Ginhatagan naman sadto suno sa iya sang ultimatum sang iban nga pungsod kaangay sang Saudi Arabia ang Qatar agud pangdakpon ang mga terorista nga yara sa ila pungsod, apang wala man ini matigayon.
