ROXAS CITY — Wala nag-upod ang transport sector sa Capiz sa simultaneous picket rally sa atubang sang Land Transportation Office (LTO) kag Land Transporation Franchising and Regulatory Board (LTFRB) subong nga adlaw sang Lunes.
Sa interview sang Bombo Radyo, ginpahayag ni Mr. Joebert Carandang, presidente sang Hugpong Transport-Capiz nga ila nadesisyunan ang pagpaiway sa pag-upod sa nasambit nga hilukuton bangud ginapreparahan nila ang patigayunon nga nationwide transport strike sa maabot nga bulan sang Hunyo.
Apang nagpahayag sa gihapon sila sang suporta sa iban nga sektor sang transportasyon sa pungsod nga magaupod sa nasambitan nga paghulag subong nga adlaw.
Liwat man nga ginapanawagan sang grupo ang pagbasura sa PUV modernization program sang gobyerno nga suno sa ila ang magaresulta sa pagkadula sang palangabuhian sang ginatos ka libo ka mga jeepney drivers kag operators bangud sa pagphase-out sa mga jeepney units nga naga-edad sang 15 ka tuig pataas.
