ROXAS CITY -Pagadulaon na sang probinsiya ang ginpatuman nga travel restriction sa border sang Capiz kag probinsiya sang Iloilo.
Ini ang ginkompirmar ni Capiz Governor Esteban Evan ‘Nonoy’ Contreras sang mainterview sang Bombo Radyo.
Ginpahayag ni Contreras nga epektibo Hulyo 7, 2020, bawion sini ang ginpatuman nga travel restrictions sa nasambit nga mga borders matapos nga nadesisyonan sang Regional Inter-Agency Task Force nga buksan na ang mga borders sa sulod sang Isla sang Panay.
Apang gin-athag sini nga hugot sa gihapon nga ipatuman ang mga minimum health protocols sa mga delivery trucks kag vans nga magasulod sa probinsiya ilabi na kun nagikan sa probinsya sang Cebu.
Ginpasiguro man ni Contreras nga hugot nga pagabantayan ang tanan nga mga puerto sa probinsiya agud malikawan nga malutsan sang mga indibidwal nga wala nagasunod sa mga health protocols.
Samtang, ginkasubo naman ni Contreras nga nagapabilin nga kanselado ang mga sweeper flights kag mga mercy voyage sakay ang mga nagapalauli nga LSI’s sa probinisiya tubtob Hulyo 15, 2020.
