ROXAS CITY – Hugot nga ginpanginwala sang tricycle driver ang alegasyon nga isa siya sa naghimulos sa 19-anyos nga babaye sa Barangay Cagay, sining syudad.
Ginpahayag ni Alfredo Delid Jr., alyas Buday nga nakibot ini sang gintudlo ni Alyas Nene nga isa siya sa duha ka mga lalaki nga nagsulod sa ila balay kag naghimulos sa iya.
Suno kay Alyas Buday nga sang oras nga ginasiling sang biktima ginsulod kag ginhimuslan ini, kaupod sini nga naga-inum ang iya mga abyan kag wala nakabiya sa ila gina-imnan tobtob las 5 sa hapon.
Aminado ini nga kun kaisa magkaupod sila nga nagainum sang live-in partner ni alyas Nene apang ginklaro nga indi man sini makita ang biktima, bangud masami yara ini sa sulod sang balay.
Ginapanindugan man sini nga wala niya personal nga nakilala ang biktima bangud bag-o lamang ini sa ila nga lugar kag malaka lamang nga magguwa sa balay.
Wala ini sang ideya kun ano ang motibo sang biktima sa pagtudlo sa iya apang handa sini nga pamatud-an nga inosente ini sa mga akusasyon kag ginabutang butangan lamang.
Samtang nahibaluan gikan kay Buday nga kun kaisa maabtan sini nga nagahampang ang iya anak kag ang biktima.
