Nagpa-Bombo ang isa ka tricycle driver matapos ginaalegar nadula ang iya kwarta sa gin-impound nga tricycle sang Traffic Management Unit sang Roxas City.
Sa interview sang Bombo Radyo kay Nicolas Vasquez Bade, iya ginpahayag nga gina-ako niya nga ang iya ginabiyahe ang isa ka colorum kag handa man siya magbayad sang penalidad.
Suno kay Bade, iya ginhingyo sa katapo sang Traffic management Unit nga kun mahimo gilayon nga makuha ang iya tricycle kun makabayad ini sang P5,000 nga multa bangud nagakabalaka ini nga basi may madula sa iya tricycle.
Pahayag pa niya, nagpasalig man ang isa sa traffic aid nga wala sang may madula nga gamit sa iya motor, apang sang tion nga kuhaon na niya ang iya motor, ginaalegar nga nadula ang iya kwarta nga kapin sa P10,000 nga kun tani idugang niya bayad sa iya balaklon.
Dugang pa niya, nagpadulong ini sa police station agud nga mag pa blotter apang ginkwestyun siya sang Head sang Traffic Management Unit kun ngaa gin bilin niya ang iya kwarta sa motor .
Nagpanawagan man ini nga kuntani mahatagan sang tikang ang iya nga nga reklamo angut sa kwarta nga nadula sa iya nga motor.
Sa patas nga pagwaragwag, ginkadtoan sang Bombo Radyo ang Traffic Management Unit apang nagpamalibad ini nga magsabat sa reklamo.
