ROXAS CITY – Temporaryo nga ginkustodiya sa Sapian Municipal Police Station ang isa ka tricycle nga may karga nga 16 ka sako sang uling matapos nga wala sang may ginpakita nga nagakaigo nga permit sa pagkarga sini sa banwa sang Sapian, Capiz.
Ginkilala ang driver nga si Gary Peñaroyo, 36 anyos sang Barangay Agsilab, Sapian, Capiz.
Sandig sa inisyal nga imbestigasyon sang Sapian Municipal Police Station nga gin-apprehend ang nasambit nga driver kag tricycle matapos nga wala sang may ginpakita nga dokumento sa pagkarga sang sinako nga mga uling nga dal-on kuntani sa Barangay Damayan sa amo nga banwa.
Samtang ang nagapanag-iya naman sang sinako nga mga uling amo si Ritchel Patricio, Susan Cortes kag Ralph Nicolas nga lunsay mga residente sang Barangay Agsilab, Sapian, Capiz.
Sa karon, yara na sa kustodiya sang mga kapulisan ang amo nga tricycle para sa nagakaigo nga disposisyon.
