Nag-landfall na ang Tropical Storm (TS) Maymay sa banwa sang Magsingal, Ilocos Sur, suno sa Philippine Atmospheric, Geophysical and Astronomical Services Administration (PAGASA).
Ang bagyo may kabaskugon nga 65 kph malapit sa sentro kag pagmadlos tubtob 110 kph, samtang nagahulag pa-sidlangan sa kadasigon nga 10 kph.
Base sa data gikan sa state weather bureau, ang TS Maymay ginalauman nga magluya sa isa ka Tropical Depression subong nga aga samtang ini nagatabok sa duta, antes mangin isa ini ka low-pressure area (LPA) sa hapon ukon gab-i. Mahimo man nga magluya ang bagyo sang mas temprano sang sa ginapaabot bangud sa epekto sang nabukid nga terrain sang Luzon.
Nagapabilin ang Tropical Cyclone Wind Signal No.2 sa ibabaw sang Ilocos Norte, Ilocos Sur, daku nga porsyon sang La Union, northwestern Pangasinan, Abra, western part sang Apayao, Kalinga, Mountain Province, northwestern Benguet, kag pila ka bahin sang Cagayan.
Samtang, epektibo naman ang Signal No.1 para sa nabilin nga bahin sang La Union, Pangasinan, Apayao, Kalinga, Mountain Province, Benguet, Ifugao, mainland Cagayan, Isabela, Quirino, Nueva Vizcaya, mga bahin sang Zambales, Tarlac, Nueva Ecija, Aurora, kag ang nabagatnan nga bahin sang Babuyan Islands.
