Nang-angkon sang kahigayunan sanday US President Donald Trump kag Ukrainian President Volodymyr Zelensky nga maghambalanay sa Vatican kahapon nga adlaw pila ka minutos antes nagsugod ang funeral mass para kay Pope Francis.
Sa litrato nga gin-share ni Zelensky sa iya X account, makita ang duha ka lider nga malapit sa isa kag isa, naga-istoryahanay nga wala sang presensya sang mga kabulig sa sulod sang St. Peter’s Basilica.
Suno sa tigpamaba sang White House nga kaupod ni Trump, pribado nga nagkitaay ang duha ka mga lider kag may produktibo nga pag-istoryahanay nga naglawig sang 15 minutos kag nag-ugyon ang duha nga padayunon ang pag-istoryahanay may kaangtanan sa gyera sa Ukraine.
Ini ang una nga face to face nga pagkit-anay nanday Trump kag Zelensky matapos ang ila mainit nga pagbayluhanay kadungan sang meeting sa White House sadtong Pebrero kun sa diin gin-akusahan ni Trump kag iban pa nga US officials si Zelensky nga “ungrateful” sa suporta sang Amerika.
