Madinalag-on kag matawhay nga ginpatigayon ang una nga Licensure Examination for Professional Teachers (LEPT) diri sa Roxas City.
Ginpabutyag ni Roxas City Mayor, Atty. Ronnie Dadivas pinaago sa oya nga social media post ang kalipay sa madinalag-on nga pagpatigayon sang examination, nga madugay na nga ginahandom sang mga nagapangabudlay agud mahatagan ang mga nagakuha sang examination sang mas hapos kag mas malapit nga access sa amu nga examination.
Ang amu nga inisyatibo natuman bangud sa pagbinuligay, dedikasyon kag sinseridad sang tagsa-tagsa ka tawo kag grupo nga nangin kabahin sang pagpatigayon sini.
Ginpahayag man nga padayon ang pagpanikasog agud matuman ang mga handum sang komunidad kag mahatag ang pinakamaayo nga serbisyo nga angay mabaton sang mga pumuluyo.
Ang madinalag-on nga pagpatigayon sang una nga LEPT sa Roxas ginakabig nga isa ka importante nga tikang sa paghatag sang mas madamo nga oportunidad sa mga nagalaum nga mangin lisensyado nga mga manunudlo.
