Nagapawagan ang United Labor Panay sa Regional Tripartite Wages and Productivity Board 6 nga paga-aprubahan ang ila gin-file nga petition para sa pagsaka sang minimum wage sa Western Visayas.
Sa interview sang Bombo Radyo kay Elmer Forro, spokesperson sang United Labor Panay, iya ginpahayag nagakadapat nga pagadugangan sang ₱250 ang wage increase para sa mga minimum wage earners sa rehiyon.
Suno kay Forro, indi na igo ang ₱550 nga minimum wage para sa adlaw-adlaw nga kinahanglanon sang mga pumuluyo, ilabi na sa padayon nga pagsaka sang presyo sang mga balaklon.
Dugang pa niya, madamo nga pamilya ang yara sa idalom sang poverty threshold ukon nagaantos sa kapigaduhon bangod indi maka-igo ang ila kita sa adlaw-adlaw nga pagpangabuhi.
Ginalantaw man sang grupo nga isa sa mga rason sang ila wage hike petition amo ang wage erosion, ukon ang pagnubo sang aktuwal nga balor sang sweldo bangod sa padayon nga pagsaka sang presyo sang mga nagapanguna nga balaklon.
