Nagdabong pa ang utang sang gobyerno sang Pilipinas sa P16.63 trillion sa pagtakop sang bulan sang Pebrero sini nga tuig, suno sa Bureau of Treasury (BTr).
Ini ang 1.96% ukon P319.36 billion nga mas mataas kun ikumparar sadtong Enero.
Pila sa rason amu ang paghulam sang gobyerno sang kwarta agud suportahan ang mas madamo pa nga mga programa kag proyekto.
Sa domestic debt sang gobyerno sadtong Pebrero, nagsaka ini sa P11.22 trillion, mas mataas ini sang P139.62 billion kun ikumparar sa nabalhag sadtong Enero.
Sa foreign debt naman sadtong Pebrero, naghabok man ini sa P5.41 trillion, mas mataas sang P179.64 billion halin sadtong Enero.
Sa pihak naman sang pagtaas sang utang sang gobyerno sadtong Pebrero, nanindugan ang economic managers sang Pilipinas nga nagapabilin sa gihapon ini nga manageable humalin pa sadtong pandemya.
Ginpasiguro ni Finance Secretary Ralph Recto nga wala sang dapat kabalak-an bangud madasig nga nagasanyog ang ekonomiya sang pungsod kaysa sa utang sini.
