Nagkadlaw lang si Vice President Sara Duterte sang ginpamangkot angut sa appointment ni Police Major General Nicolas Torre III bilang bag-o nga hepe sang Philippine National Police (PNP), magabulos kay Gen. Rommel Marbil nga magaretiro sa Hunyo 7.
Sa isa ka interview sa The Hague, Netherlands, samtang nagasaulog sang iya kaadlawan si VP Sara upod kay anay Presidente Rodrigo Duterte, nagsiling si VP Duterte nga “That’s my reaction”, kag gilayon nga nagsiling, Next question. Sang ginpilit sia para sa dugang nga reaksyon, nagkadlaw sia liwat kag nagsiling, “That’s it.”
Matandaan nga sa subong si Torre ang director sang Criminal Investigation and Detection Group (CIDG), ang nangin ground commander sang police team nga nagserbe sang arrest warrant batuk sa anay Presidente Rodrigo Duterte nga preso sa gihapon sa International Criminal Court (ICC) sa The Hague bangud sa mga alegasyon sang krimen batok sa katawhan may kaangtanan sa iya mapintas nga ‘wars on drugs’.
Sa pihak nga bahin, gin-athag ni General Marbil nga ginpili si Torre bilang bag-o nga hepe sang PNP bangud sa iya pagpamuno, kag indi bilang padya sa iya papel sa pagdakop sa anay presidente.
