Nagapati si World Boxing Council president Mauricio Sulaiman nga makaangon sa gihapon sang init sa boxing ring ang hampang ni Filipino boxing icon Manny Pacquiao kay Mario Barrios.
Ginsiling sini nga wala siya sang nakita nga paghinulsol sang ginsugtan niya si Pacquiao nga hangkaton si Barrios para sa welterweight title sa MGM Grand Las Vegas.
Ginpakigbahin sini ang mga pamaagi nga ginpatigayon kun sa diin ang una amo ang pagpaidalom sa medical examinations kag ini man ang napasar ni Pacquiao kag nahatagan man sya sang lisensiya nagikan sa commission.
Ang Nevada suno sa iya ang isa sa mga estado nga mag pinakahugot kag ginakilala nga boxing commission sa bug-os nga kalibutan.
Gin-aprubahan man sang WBC board ang welterweight title fight ni Pacquiao kay Barrios.
Nangin emosyonal pa suno sa iya si Pacquiao sang tawagan siya ni Sulaiman bangud sa ang una nga championship belt sini ang iya pa sa WBC flyweight kag sa karon challenger na siya sa WBC welterwieght.
Ginpahagan-hagan man ni Sulaiman ang mga pagduda kay Pacquiao bangud sa edad sini nga 46 kun sa diin ginsiling nga wala na ini sang may ikasarang.
Ginsiling pa ni Sulaiman nga ang boxing isa contact sports kag nakita niya si Pacquiao nga wala ini sang bisyo pareho sang pag-inom sang alak kag indi abusador sa lawas rason nga tubtob sa karon yara sa kondisyon ang iya sini nga lawas.
