ROXAS CITY – Patay ang isa ka 18-anyos nga lalaki samtang pilason naman ang kaupod sini matapos nga makuryente samtang nagakay-o sang antenna sang piso wifi sa Sitio Tambo, Barangay Binaobawan, Pilar, Capiz.
Ginkilala ang mga biktima nga sanday Joey Santos ,18-anyos kag John Christian Serrano, 26-anyos, lunsay residente sang Barangay Natividad sa nasambit nga banwa.
Sa interview sang Bombo Radyo kay PMAJ. Alfred De Leon , hepe sang Pilar MPS, ginpahayag sini nga sandig sa ila ginpatigayon nga imbestigasyon, samtang ginakay-o sang mga biktima ang antenna sang piso wifi nga human sa kawayan, aksidente nga sumangit sa live wire ang huluhaligi sang kawayan nga may banting nga mga alambre nga ila kun tani nga ginapatindog nga nagresulta sang ila pagkakuryente.
Nadulaan sang alinto si Santos samtang nag-angkon naman sang pilas kag mga paso si Serrano sa magkatuhay nga parte sang lawas.
Gilayon naman nga nagresponde ang mga katapo sang MDRRMO Pilar kag ginpadangat si Santos sa Bailan District Hospital apang gindeklarar ini nga dead on arrival sang doktor samtang gindala naman sa RHU Pilar si Serrano kag gindapatan sang nagaka-igo nga pagbulong antes ginpapa-uli.
Dugang pa ni De Leon, naga part time lamang sa pagpanakod sang piso wifi ang mga biktima kag matapos ang insidente, nagpadulong naman sa Pilar Municipal Police Station ang ginakabig nga employer sang duha kag nagpasalig nga magabulig sa mga galastuson sang ila tagsa ka mga pamilya.
Sa karon, yara na sa isa ka purenarya sa banwa sang Pilar ang bangkay ni Santos samtang padayon naman nga nagapa-ayo si Serrano.
