ROXAS CITY — Patay na sang gindala sa Capiz Emmanuel Hospital ang 41-anyos nga lalaki matapos nga nagsampukanay ang duha ka mga tricycle sa Barangay Agtatacay, Sapian, Capiz.
Pilason man ang lima ka mga menor-de-edad nga sakay sang isa sa mga tricycle.
Ba-se sa inisyal nga imbestigasyon sang kapulisan, tuyo kuntani nga mag-overtake ni Leony Oroceo sang Barangay Agnorte sang amo man nga banwa sa isa ka salakyan samtang ginasubay sini ang karsadahon sa nasambit nga lugar.
Apang wala matalupangdan ni Oroceo ang kasumalang sini nga tricycle nga ginamaneho ni Joel Delatina, 50-anyos, sakay sanday Maria Dali Delatina, 45-anyos, kag lima ka mga menor-de-edad rason nga nagsampukanay ang duha ka tricycle.
Gilayon nga gindala sa nasambit nga ospital si Oroceo matapos nag-agum sang seryoso nga kasamaran sa lawas apang gindeklarar ini nga dead-on-arrival.
Samtang padayon naman nga ginabulong sa Mambusao District Hospital si Delatina upod ang lima ka mga sakay sini matapos nakaangkon man sang magkatuhay nga kasamaran sa ila nga lawas.
