ROXAS CITY – Padayon pa nga ginapangita ang 15-anyos nga lalaki matapos nga ginapatihan nga gin-anod sang tubig-baha sa Barangay Capuyhan banwa sang Sigma.
Ginkilala ang biktima nga si alyas ‘Paolo’ residente sang nasambit nga barangay.
Sandig sa impormasyon nagikan sa Sigma MDRRMO, nakita sang biktima ang mga bata nga nagapaligo sa uyapad kag isa diri ang nalumos kag nagapangayo sang bulig.
Ginapahayag nga ginlumpatan sang biktima ang bata agud luwason apang siya ang gin-anod sang mabaskog nga current sang tubig kag tubtob sa karun wala pa makita.
Samtang, natigayon naman nga ma-rescue sang amay ang iya bata nga nagapangayo sang bulig.
Mahibaluan nga naghiwat sang search and rescue ang mga awtoridad sa amu nga biktima apang ini ang temporaryo nga gin-untat bangud gab-i na kag madulom na sa amu nga lugar.
