ROXAS CITY – Nabaton na sang duha ka centenarian sa Roxas City ang ila nga cash gift gikan sa Department of Social Welfare and Development (DSWD).
Nagaluha luha sa kalipay sanday Celedonia Billones 101 yrs old sang Sitio Pamumbungan, Barangay Milibli, Roxas City kag Isidro Dalumpines sang Barangay Bago, Roxas City sang mabaton na ang tag P100,000 nga cash gift gikan sa gobyerno
Suno kay Nanay Celedonia wala ini nagdahum dahum nga makauyat pa ini sang kasubong kadaku nga kantidad.
Lubos naman ang pasalamat sini sa gobyerno bangud ila nabatyagan ang ila importansiya sa sosyudad.
Magluwas sa cash gift makabaton pa ang duha ka centenarian sang felicitation letter gikan kay President Rodrigo Duterte.
Samtang ginpahayag naman ni City Social Welfare and Development Officer Cynthia Besana nga makabaton man sang plaque of recognition sanday Nanay Celedonia kag Tatay Isidro nagaplano pa ang gobyerno lokal sang Roxas City nga magpapasar sang resolution nga magahatag sang dugang nga insentibo sa duha ka centenarian.
