ROXAS CITY – Menor nga pilas ang naangkon sang duha ka mga menor de edad matapos nga nabungguan ang ginasakyan nga tricycle sa Highway Crossing Capiz Centrum Hospital, Barangay Banica Roxas City alas 6:15 sang gab-I, Hulyo 25.
Ang wala na ginhingadlan nga mga biktima ang nagapang-edaron sang 17-anyos kag 9 ka tuig lunsay mga residente sang nasambit nga lugar.
Sandig sa imbestigasyon ni PCpl. Ben Angelo Celino, traffic investigator sang Roxas Component City Police Station samtang ginasubay sang tricycle nga ginamaneho ni Fernando Vista, 49-anyos, residente sang Brgy Baybay ang dalanon gikan sa syudad sakay ang duha ka menor de edad, pag-abot sa ginluntaran sang aksidente hinali nga nagliko ang kasugata nga motorsiklo sini nga ginamaneho ni Albert Bartocillo, 42-anyos residente sang Brgy. Tanza Gua rason sang pagbungguanay sang duha ka mga behikulo.
Bangud sa impact, nag-angkon sang menor nga pilas ang duha ka mga pasahero nga gindapatan naman sang nauna nga pagbulong sang Roxas City Emergency Response Team (RCERT) antes ginpadangat sa ospital.
Sa karon, yara sa kustodiya sang RCCPS ang mga nadalahig nga behikulo para sa nagakaigo nga disposisyon.
