ROXAS CITY – Pilason ang duwa ka persona matapos mabungguan sang motorsiklo ang isa ka 33-anyos nga lalaki sa Brgy. Bitoon Ilaya, Cuartero, Capiz.
Ginkilala ang biktima nga si Jenoel Lapsu Tabiano, isa ka mamumugon kag residente sang Brgy. Caidquid sa banwa sang Mambusao.
Samtang, ang driver sang motorsiklo ang ginkilala kay Bernie Bustos Manansala, 20-anyos residente sang Brgy. Bitoon Ilaya, Cuartero.
Sandig sa imbestigasyon sang Cuartero Municipal Police Station, nga samtang nagalakat ang biktima sa national highway sa bahin sang Brgy. Bitoon Ilaya, takna alas 10 kagab-i, Mayo 16, wala ini matalupangdan ni Manansala rason nga aksidente ini nga nabungguan.
Bangud sa natabo, lunsay nag-angkon sang kasamaran sa magkatuhay nga parte sang kalawasan ang biktima kag ang driver sang motorsiklo nga Honda XRM 125 matapos nga natumba.
Madasig naman nga gindapatan sang pauna nga pagbulong sang Cuartero Emergency Response Unit ang duwa ka persona kag ginpadangat sa Dao District Hospital.
Ginkustodiya naman sang mga kapulisan ang motorsiklo nga kalakip sa insidente para sa nagakaigo nga disposisyon.
