ROXAS CITY, CAPIZ – Ginpakigbahin sang 2nd Capiz Provincial Mobile Force Company (PMFC) ang ila madinalag-on nga mga operasyon kag programa halin Enero tubtob Hunyo 2025.
Sa interview sang Bombo Radyo kay Police Captain Dandy Delfin, Deputy Force Commander sang 2nd Capiz PMFC, iya ginpahayag nga pinaagi sa ginpasangkad nga kampanya kontra illegal nga armas-luthang nga ginpangunahan sang police community operations personnel kag intelligence operatives, anum (6) ka mga armas ang boluntaryo nga gin-turn over sang mga pumuluyo.
Dugang pa sang natungdan, duha ka miyembro sang Communist Terrorist Group (CTG) halin sa banwa sang Tapaz kag Mambusao ang boluntaryo man nga nagbalik-loob sa gobyerno. Suno kay PCAPT Delfin nga ang ila pag-surrender bangud sa mga patalang nga promisa kag wala padulungan nga direksyon sang ila nga grupo.
Samtang, isa man ka babaye nga miyembro sang sectoral group supporter ang nagpahayag sang withdrawal of support. Ang amo nga babaye ginapahayag nga nagabulig sa pagbakal sang pagkaon para sa mga rebelde ilabi na sa Igabon Platoon.
Pag-abot naman sa Joint Operations, naaresto Sang 2nd CPMFC ang napulo (10) ka mga persona nga may warrant of arrest sa mga ginpatigayon nga joint law enforcement operations upod ang iban nga law enforcement agencies.
Tatlo (3) naman ka search warrants ang gin-implementar nga nagresulta sa pagpasaka sang kaso batok sa duha (2) ka indibidwal sang paglapas sa RA 10591 ukon Comprehensive Firearms and Ammunition Regulation Act, kag sang Violation of Explosives Law.
Ginpaathag man ni Delfin nga subong, ang 2nd PMFC ang naga-initiate sang mga operasyon kaangay sang search warrant, nga sang una ginahimo lamang sang CIDG kag kapulisan.
Ginpabugal man ni PCAPT Delfin ang ila mga best practices, pareho sang Project Angga nga nagatanyag sang libre nga circumcision, haircut, kag feeding program kada bulan.
Sa masunod nga bulan, ipatuman ang Pabuligan Project nga isa ka Livelihood Training and Seminar sa Brgy. Libertad, Tapaz, Capiz.
Ginpasalamatan ni Delfin ang mga personnel sang 2nd Capiz PMFC sa ila dedikasyon kag pagserbisyo para sa kalinong kag katawhay sang komunidad.
