DAO CAPIZ – Patay ang menor de edad nga lalaki matapos nalumos sa suba kaina sang aga Abril 26, 2025 sa Barangay Poblacion Ilaya, Dao, Capiz.
Ginkilala ang biktima nga si alyas Jem, 13-anyos, kag residente sang Sitio Owihao, Barangay Amaga Sigma, Capiz.
Sa impormasyon nga nakuha sang Bombo Radyo sa kay Punong Barangay Tomas ‘Montot’ Ibrada, naghinagaday si alyas Jem kaupod ang duha sini ka pakaisa nga nagapang-edaron sang 8-anyos kag 12-anyos nga magpaligo sa bahin sang ginakay-o nga river control sa nasambit nga barangay.
Nahibaluan nga nag-upod ang amo nga bata nga lalaki sa iya amay nga foreman sa ginakay-o nga river control.
Pahayag pa ni Kap Ibrada nga ulihi na nadiparahan sang amay nga nalumos ang tatlo sang magsinggitan ang mga tawo malapit sa lugar.
Gilayon man nga ginrespondihan sang Dao Emergency Response Unit, Dao Fire Station kag Dao PNP ang lugar kag nasalbar ang duha ka pakaisa samtang naglab-ot naman sa isa ka oras antes nakit-an ang 13-anyos nga bata nga gindala sa pinakamalapit nga ospital, apang ginderklarar nga dead on arrival sang doctor nga nag atendir.
Sa karon yara na ang bangkay sang biktima sa isa ka punerarya sa nasambit nga banwa.
Sa pihak nga bahin, gintuad ni Mr. Wilmor Robles sang Dao Emergency Response Unit nga nagpadulong sa madalom nga bahin sang suba ang biktima rason nga ini ang nalumos.
Nagpanugyan naman si Robles sa mga pumuluyo nga maghalong kun nagapaligo kag bantayan gid sang mga ginikanan ang ila mga kabataan agud malikawan ang pila ka mga insidente kaangay sang pagkalumos.
