IVISAN, CAPIZ – Ginbawian sang kabuhi ang 37-anyos nga lalaki matapos nga ginlabo sang isa ka mangunguma sa Sitio Pinamantawan, Brgy. Mianay, Ivisan, Capiz.
Ginkilala ang biktima kay alyas Isidro samtang ginkilala naman ang suspek kay alyas Joebel nga lunsay nga yara sa legal nga pang-edaron kag mga residente sang nasambit nga Barangay.
Base sa impormasyon nagikan sa Ivisan PNP, ginpahayag nga yara sa impluwensya sang makahulubog nga ilimnon ang biktima kag may dala nga binangon sang nagpadulong ini sa tindahan sang suspek.
Ginaalegar nga may natabo nga pagbinaisay sa magtimbang nga bahin tubtob nga ginlabo sang biktima ang suspek.
Bangud sa natabo, nag-angkon sang pilas ang suspek sa natu-o nga dughan apang nagbalos naman insigida labo ang suspek kag ginlabo ang biktima sang pila ka beses.
Madasig naman nga nakapalagyo ang suspek matapos makumiter ang krimen.
Nag-angkon sang mga patal nga pilas ang amo nga biktima kag gilayon naman ginpadangat sa ospital apang ginbawian ini sang kabuhi samtang ginabulong.
Nahibaluan nga narekober naman ang duha ka binangon nga gingamit sang pagpanglabo sa ginluntaran sang insidente.
Sa karon yara na sa paghinakop sang kapulisan ang suspek matapos madakpan sa ginpatigayon nga hot pursuit operation sa lugar.
