38 ka menor de edad ang na-identify nga naglapas sa traffic ordinances sa Capiz bilang kabahin sang Oplan Sagip Bata nga ginpatigayon sang Police Regional Office 6 (PRO6) sang Setyembre 13, 2026.
Sandig sa consolidated report sang PRO6, kabug-osan nga 273 ka menor de edad ang naglapas sa traffic ordinances sa 276 ka operasyon nga ginpatigayon sa bilog nga Western Visayas.
Sa 273 ka menor de edad, 195 ang ginhatagan sang warning, samtang 78 ang ginmultahan santu sa mga lokal nga ordinansa.
Pinakadamo ang narekord sa Iloilo Police Provincial Office nga may 102 ka menor de edad nga naglapas sa traffic ordinances.
Ginasundan ini sang Aklan PPO nga may 42; Capiz PPO, 38; Antique PPO, 36; Iloilo City Police Office, 32; Regional Mobile Force Battalion 6, 15; kag Guimaras PPO, walo.
Ang Oplan Sagip Bata kabahin sang Safer Cities Initiatives sang PRO6 nga may katuyoan nga mapahugot ang seguridad sa mga dalan kag pampubliko nga lugar pinaagi sa mas istrikto nga pagpatuman sang mga kasuguan kag lokal nga ordinansa.
Lakip man sa kampanya ang pagproteher sa mga kabataan batuk sa mga peligro nga mahimo matabo bangod sa indi safe kag indi responsable nga paggamit sang motorsiklo kag iban pa nga salakyan.
Ginpahayag man ni PBGen Randulf T. Tuaño, Regional Director sang PRO6, nga indi lamang pagpatuman sang ordinansa ang katuyoan sang operasyon kundi labi na ang pagproteher sa kabataan.
Bangud sini, ginapangabay sang PRO6 ang mga ginikanan, guardians, barangay officials kag iban pa nga miyembro sang komunidad nga magbuligay sa paggiya sa mga menor de edad.
