ROXAS CITY – Apat ka mga indibidwal ang ginpakustodiya sa Pres. Roxas Municipal Police Station kasunod sang paglapas sa ginapatuman nga curfew hour sa probinsya sang Capiz.
Una diri nadakpan ang tatlo ka mga persona nga sanday Robinson Carmen 19-anyos, Enrico Benedicto 18-anyos kag 17-anyos nga menor de edad nga lunsay mga residente sang Barangay Cubay sang nasambit nga banwa.
Base sa inisyal nga imbestigasyon sang Pres. Roxas Municipal Police Station nga nadakpan ang tatlo ka nasambit nga mga persona nga nagalagaw sa oras sang curfew.
Ginapahayag nga mabakal kuntani sang pagkaon ang nasambit nga mga persona sang nadakpan ini sang mga otoridad.
Samtang, dakop man ang isa ka persona nga si Vicmar Delfin 21-anyos sang Barangay Hipona, Pontevedra, Capiz matapos nga ginaalegar nga mabakal kuntani sang frozen foods kaupod ang iya abyan nga si Jestoni Daliva sa diin ginaalegar nga ginhambalan pa sini si Punong Barangay Arnulfo Degala sang Barangay Marita nga may yara sang Coronavirus Disease (COVID19).
Apang, madasig naman nga nakapalagyo si Daliva sakay sa iya nga motorsiklo samtang nadakpan naman si Delfin.
Mahibaluan nga ginapatuman sa karon ang province-wide curfew sa probinsya humalin alas 8 sa gab-i tubtob alas 5 sa aga bilang preventive measure bangud sang coronavirus disease (COVID-19) pandemic.
