Patay ang apat ka tuig nga bata nga lalaki matapos ginaalegar ginbuno sang iya iloy sa ila balay sa Barangay Surgui 1st, Camiling, Tarlac.
Suno kay Lt. Col. Elogio Lamqui III, Acting Chief of Police sang Camiling Police Station, halin sa trabaho ang amay sang biktima kag pag-abot sini sa balay nila pasado las onse sang aga, natingala ini nga wala sang tawo.
Sang nagalakat ang amay, nakita niya ang iya anak nga duguon kag natabonan sang habol sa kilid sang ila balay.
Gindala sang amay ang iya anak sa sulod sang balay, sa diin naabtan niya ang iya tiayon.
Sang makita siya sang suspek, gilayon ini nagdalagan palayo.
Sandig naman sa panaysayon sang walo ka tuig nga utod sang biktima, ginsugo sila sang ila iloy nga nagbakal sa tindahan.
Pagbalik nila, gilayon na lang nga ginbutong sang iloy ang biktima kag ginbuno sa liog.
Bangud sa kakulba, nagdalagan ang walo ka tuig nga bata kag wala ini nagpanugid.
Nagpangayo sang bulig ang amay sa mga opisyal sang barangay kag gintawgan sang pulis.
Natigayon nga madakpan ang suspek matapos nakit-an nga nagapanago malapit lang sa ila balay.
Suno sa bana, may problema sa paminsaron ang iya misis apang wala ini nakapa-check up bangud sa kakulang sa kwarta.
