ROXAS CITY – Ginpanagtag ang P1,156,000 nga balor sang cheque sa 42 ka mga insured farmer beneficiaries nga apektado sang African Swine Fever (ASF) sa probinsya sang Capiz.
Ini ang ginkumpirmar ni Mrs. Sylvia Dela Cruz, provincial agriculturist, sang mainterview sang Bombo Radyo.
Suno diri, ini ang programa sang national government sa Philippine Crop Insurance Corporation (PCIC) nga may tinutuyo nga ma-insured ang mga farmer sang rice, corn, livestock, fisheries kag high value commercial crops agud maprotektahan kag mabuligan ang mga ini sa posible epekto sang kalamidad, baha ukon bagyo.
Pinakadako naman nga kantidad nga nabaton sang isa ka insured nga mangunguma ang nagdangat sa P105,000, bangud nakadepende sa iya ginpa-insured kag sa kadamuon sang apektado.
Samtang, sa mga wala nakapa-insured, ginatinguhaan sang provincial government nga mabuligan ang mga ini pinaagi sa gin-alokar nga P3 milyon nga pondo.
Libre man suno diri ang pagpa-miyembro sa PCIC sa idalom sang pondo sang provincial government, magpakig-angut lamang sa mga opisina sang municipal agriculturist para sa guidelines, mahimo man sa PCIC-Capiz sa Brgy. Lawaan, sini nga syudad ukon sa Office of the Provincial Agriculturist sa corner Mabini St., Inzo Arnaldo village, Roxas City.
