ROXAS CITY-Padayon ang ginapatigayon nga Seach and Retrieval Operation sang mga katapo sang Municipal Disaster Risk Reduction and Management Office sa banwa sang Dumalag sa lawas sang 46-anyos nga Seafarer nga ginaalegar nga nalumos sa Malibong River sa Barangay Dolores, Dumalag Capiz.
Sa interview sang Bombo Radyo sa kay MDRRM Officer Mr.Jovel Dacutan ginpahayag sini nga nabudlayan subong nga magpatigayon sang search and retrieval operation ang mga katapo sang MDRRMO sa lawas ni Marnel Bulahan bangud nagalabalik sa mataas nga lebel ang tubig sa suba kada hapon.
Suno sa kay Dacutan nga masami 2 tubtob 3 ka adlaw gid lamang kag nagalutaw na ang lawas sang mga nagakalalumos apang sa kaso ni Bulahan, Lima na kaadlaw ang nakaligad nga wala sa guihapon nakita ang lawas sang biktima.
Dako ang pagpati ni Dacutan nga nalumos ang biktima apang posible wala pa sang mga indibidwal nga nakasapo sa lawas sang biktima.
Nagpasalig naman si Dacutan nga magabilin ang operasyon sang MDRRMO tubtob makita ang lawas sang biktima.
Samtang nagalaum sa guihapon ang himata ni Bulahan nga buhi ini kag wala nalumos sa nasambit nga suba.
Matandaan nga lima na ka adlaw nga missing ang biktima nga ginaalegar nalumos samtang nagatabuk sa amo nga suba.
