ROXAS CITY – Wala na sang kabuhi ang 47-anyos nga mister matapos nga nasapwan sang iya mga himata sa sulod sang iya nga panimalay sa Barangay Tinaytayan, Dumarao Capiz.
Ginkilala ang biktima nga si Romeo Domingo, residente man sang nasambit nga lugar.
Sandig sa inisyal nga imbestigasyon sang Dumarao Municipal Police Station nga nasapwan na lamang ang biktima sang iya sini nga utod sa sulod sang iya nga panimalay nga isa na ka bangkay sang tion nga gindal-an ini sang pagkaon.
Mahibaluan nga naga-isahanon na lang biktima nga naga-istar sa iya nga panimalay kag may yara sang ginasupreher nga nervous breakdown kag mental disorder.
Nagapati naman ang mga himata sini nga posible nga bangungot ang gintunaan sang kamatayon sang biktima.
Sa karon yara na sa isa ka punenarya ang bangkay sang biktima sa nasambit nga banwa.
