ROXAS CITY – Mayorya sa mga taga-Estados Unidos ang nagapati nga makuha sang Toronto Raptors ang ila labing-una nga kampeonato sa NBA kontra sa nagatuyo sang three-peat championship nga Golden State Warriors.
Ini ang ginpahayag ni Bombo international correspondent Raffy Fernando, tumandok sang Capiz kag nakabase sa karon sa Indiana, USA sang mainterview sang Bombo Radyo Roxas.
Suno kay Fernando nga antes pa man nagsugod ang best-of-seven championship series, naguha sa Betonline nga 47 sa 50 ka mga estados sang Estados Unidos ang nagapati nga makuha sang Raptors ang kampeonato subong nga season.
Base sa nasambit nga resulta, ang California, Nevada kag Hawaii gid lamang ang nagapabor sa defending champion nga Warriors.
Ginpahayag pa ni Fernando nga posible natak-an naman ang mga NBA fanatics sa Golden State rason nga nagapabor sila sa Raptors nga first time nakaabanse sa finals sa bilog nila nga franchise history.
Suno naman sa pila ka mga sports analysts, posible maglab-ot pa sa Game 6 ukon 7 ang hinampang sang duha ka hubon sa NBA championship.
Mahibaluan nga sa ginpatigayon nga hinampang sa Scotiabank Arena sa Canada, nakabawi ang Golden State sa Game 2 batuk sa Raptors sa iskor nga 109-104 rason nga napatas sini ang serye sa 1-1.
Ang Game 3 ang patigayunon naman sa Huwebes nga adlaw, alas 9:00 sang aga (oras sa Pilipinas).
