Pilas ang naangkon sang 49-anyos nga lalaki matapos ginluthang sang wala pa makilala nga lalaki alas 8:10 kagab-i, Marso 12 sa Barangay Ongol Ilaya, Dumarao, Capiz.
Ginkilala ang biktima kay alyas “Leo”, isa ka crane operator nga residente sang Barangay Dolores, Dumalag, Capiz samtang wala pa matumod ang suspek.
Sa interview sang Bombo Radyo kay PLT Russel G. Husmalaga, OIC sang Dumarao Municipal Police Station, ginpahayag sini nga samtang nagasakay ang biktima sa iya Rusi nga motorsiklo gikan sa iya ulubrahan sa San Dionisio, lloilo kag padulong kun tani sang banwa sang Dumalag, apang pag-abot sa lugar may kadungan ini nga motorsiklo nga isa ka Yamaha Aerox 155 nga nagaduag pula.
Ginpahayag nga sang nagtuyo ini nga mag-overtake, nag-overtake man ang suspek kag nagpundo sa atubang sini kun sa diin may natabo nga pagbaisay sa tunga sang suspek kag biktima.
Hinali nalang nga naggabot sang wala matumod nga armas-luthang ang suspek kag ginluthang ang biktima. Naigo ang likod nga parte sang lawas sang biktima kag gilayon naman nga nagpalagyo ang suspek padulong sa direksyon sang banwa sang Cuartero, samtang ang biktima nagtinguha nga makapauli sa ila balay.
Madasig naman nga gindala sang pamilya ang biktima sa Tapaz District Hospital para mabulong apang gin-transfer ini sa Roxas Memorial Provincial Hospital para sa nagakaigo nga pagbulong.
Sa karon, nagapadayon pa ang imbistigasyon sang kapulisan angut sa nasambit nga insedente.
