ROXAS CITY – Negatibo na sa paralytic shellfish poison (PSP) ukon toxic red tide ang kalalawran sang Sapian, Ivisan, Panay, President Roxas, Pilar kag Roxas City sa Capiz.
Ini ang ginkumpirmar ni Mr. Edwin Javier, Provincial Fishery Officer sang Bureau of Fisheries and Aquatic Resources (BFAR) sang mainterview sang Bombo Radyo.
Suno diri, sandig sa ginpaguwa nga Shellfish Bulletin No. 30 series of 2023 sang ahensya napetsahan Disyembre 21 hilway na sa red tide toxins ang nasambit nga mga coastal areas magluwas lamang sa banwa sang Pontevedra nga nagapabilin nga mataas ang toxicity level.
Pahayag pa ni Javier, antes nakumpirmar nga negatibo sa red tide ang mga nasambit nga kalalawran ginpaidalum sa serye sang meat sampling ang mga ini agud masiguro ang resulta.
Kadungan sa pagnegatibo sng resulta, mahimo na nga makakaon sang panginhason nagikan sa mga nasambit nga lugar.
Apang pahanumdum ni Javier nga maghagan-hagan sa pagkaon sang panginhason bangud ang sobra-sobra ang may malain man nga epekto sa ikaayong lawas.
