ROXAS CITY – Nagapabilin sa kustodiya sang Bantay Dagat sa Barangay Libas sining siyudad ang apat ka mga sakayan matapos nga nadakpan nga nagapatigayon sang iligal nga pagpangisda sa baybayon sang Barangay Culasi, Roxas City.
Kalakip sa mga sakayan amo ang MB SOPHEA nga ginapanag-iyahan ni Roberto Carlos,sakay ang isa ka boat captain kag duha ka mga crews nga lunsay mga residente sang Barangay Culasi sining syudad.
Ang MB MARKSEN naman ang ginapanag-iyahan ni Mark Udar nga ginabug-osan sang apat ka mga crews kag MB TRINA naman ang ginapanag-iyahan ni Jeck Barredo nga may tatlo ka mga crews kag MB MARGA nga ginapanag-iyahan ni Bong Lachica sakay ang apat ka mga crews nga lunsay mga residente sang Barangay Culasi sining siyudad.
Narekober naman sa posisyon sang mga arestado ang mga fishing paraphernalia’s nga ginamit sang mga ini sa pagpatigayon sang iligal nga pagpangisda.
Sa pihak nga bahin, nadakpan naman ang sakayan nga ginapanag-iyahan ni Rommel Andrade nga nagapatigayon sang iligal nga pangpangisda sa Barangay Balaring, Ivisan, Capiz.
Sa karon, natalana naman nga iturned-over sang Bantay Dagat sa Ivisan Municipal Agriculture’s Office ang mga fishing paraphernalia’s nga ginamit sini sa pagpangisda.
