ROXAS CITY – Arestado ang lima ka mga miyembro sang pamilya sang ginbansagan nga FOREX Investment Scam Queen Lourdes Bulaquiña Baarde pinaagi sa gintingub nga puwersa sang Warrant, Intel kag Investigative Section sang Roxas City Police Station, Panay Municipal Police Station, Pontevedra Municipal Police Station, Criminal Investigation and Detection Group kag Bacolod City Mobile Force Company sa Barangay 37, San Sebastian St., Bacolod City.
Ginkilala ang mga nadakpan nga sanday Roy Bulaquiña, 38 anyos; Norberto Bulaquiña, 69 anyos; Dominica Bulaquiña, 69 anyos kag lunsay mga residente sang Barangay Oeste, Panay, Capiz; Oscar Bulaquiña, 69 anyos kag Jennifer Bulaquiña, 43 anyos nga mga lunsay residente sang Barangay Tacas, Pontevedra, Capiz.
Ang nasambit nga mga persona nagapangatubang sang kaso nga Syndicated Estafa kag wala na sang nagakaigo nga piyansa nga ginrekomendar ang korte para sa ila temporaryo nga kahilwayan.
Ang nasambit nga warrant of arrest ginpapanaug kag ginpirmahan ni Honorable Judge Lorencito Diaz, Presiding Judge sang Regional Trial Court Branch 17, Roxas City nga ginpetsahan sadtong Enero 15, 2020.
Sa karon, nakahunong na sa karsel sang Roxas City Police Station ang nasambit nga mga suspek.
Matandaan nga una na nga nadakpan sang mga kapulisan ang ginbansagan nga FOREX investment scam queen nga si Baarde sang Barangay Baybay, Roxas City kag Joel Domayan sang Quezon City.
