Gintugutan sang International Criminal Court (ICC) ang 539 ka mga ginaalegar biktima sang anti-drug campaign sang administrasyon ni former President Rodrigo Duterte nga magpartisipar sa hearing may kaangtanan sa kaso nga crimes against humanity batok sa iya.
Suno sa korte ang mga partisipante ang ginalakipan sang pamilya sang mga napatay sa anti-drug campaign.
Gin-appoint man sang mga judges sanday Joel Butuyan kag Gilbert Andres, upod kay Paolina Massidda, nga magserbe bilang isa ka grupo sang legal nga magatindog para sa mga biktima.
Ginalauman nga maga-atubang sa kaso si Duterte sa idalom sang Article 63 sang Rome Statute nga nagakinahanglan nga yara sa trial ang mga akusado.
Ginkalipay naman sang Amnesty International Philippines ang nasambit nga desisyon kag gintawag ini nga madugay na nga ginahulat nga tikang padulong sa hustisya para sa mga biktima. Si Ritz Lee Santos III nagsiling nga ini “isa ka makasaysayan nga tion” nga nagpakita nga “ang lapnag kag sistematiko nga pagpatay mahimo manabat bilang isa ka krimen batok sa katawhan.”
Dugang sini nga ginapakita man sang kaso ang kadakuon sang pagpamatay sa idalum sang kampanya kontra droga kag ang ginaalegar kakulang sang mga lokal nga institusyon agud manabat ang mga responsable.
