ROXAS CITY – Arestado ang anum ka mga kalalakinhan matapos akto nga nadakpan nga nagapatigayon sang iligal nga pagbulang sa Barangay Dumulog, Roxas City.
Ginkilala ang mga nagkaladakpan nga sanday Noel Francisco, 61, Emark Delantar, 31, Marcelo Telles Jr., 40, Joseph Aleligay, 55, Antonio Gredes, 61, kag Marlon Dela Cruz, 65, lunsay mga residente sang nasambit nga barangay.
Sandig sa impormasyon nga nakuha sang Bombo Radyo sa Roxas Component City Police Station, may nagpalab-ot sang impormasyon sa mga kapulisan angut sa nagakahinabo nga tupada sa lugar nga gilayon ginpadulongan sang mga katapo sang Intel operatives kag akto nga nadakpan ang nasambit nga mga kalalakinhan.
Narekober sa lugar ang anum ka mga pambulang nga manok, 2 ka bulang’ kag kuwarta nga nagabalor sa P1,353 nga ginapatihan pusta.
Sa karon yara sa kustodiya sang Roxas City PNP ang nagkaladakpan kag natalana nga pasakaan sang kaso nga paglapas sa PD 1602 as amended by RA 9287 ukon “An Act Increasing The Penalties For Illegal Numbers Games & Its Implementing Rules”.
