Maga-donate ang gobyerno, pamaagi sa Department of Social Welfare and Development (DSWD) sang 720 metric tons sang nakumpiskar nga smuggled nga frozen mackerel sa mga pamilya nga naapektuhan sang mga nag-agi nga bagyo kag kalamidad, suno sa mga opisyal sang Bureau of Customs (BOC) kag Department of Agriculture (DA).
Sa ginpatigayon nga inspeksyon sa Port of Manila sang Biyernes, Agosto 8, ginsiling nanday BOC Commissioner Ariel Nepomuceno kag DA Secretary Francisco Tiu Laurel Jr. nga ang frozen fish ang ginrekomenda mismo ni Presidente Ferdinand Marcos Jr. para i-donate sa mga nagakinhanglan nga komunidad.
Suno kay Tiu Laurel, luwas kag fit for human consumption ang isda base sa mga ginpatigayon nga eksaminasyon.
Samtang, ginsiling man ni Nepomuceno nga may mga kaso na nga gin-file batok sa mga consignee kag broker sang kontrabando nga kargamento nagikan sa China.
Magapangatubang sa kaso nga kriminal ang mga suspek sa idalom sang RA 10863 ukon Customs Modernization and Tariff Act, kag sa karon may yara na sang preliminary investigation sang Department of Justice (DOJ).
Tagsa ka container van, may karga nga mas ukon menos 30 metric tons sang frozen fish, rason nga magalab-ot sa 720,000 kilo ang kabilugan nga balor sang nakumpiskar nga isda —bastante para mahatagan sang tig-isa ka kilo ang masobra 700,000 ka pamilya.
Ginapahayag nga ginmando man ni Presidente Marcos nga pabaskugon pa sang mga ahensya, labi na ng Department of Agriculture, ang kampanya batok sa agricultural smuggling agud maprotekteheran ang lokal nga mangunguma, ikaayong-lawas sang publiko, kag masiguro ang tama nga pagbayad sang buwis kag taripa.
