ROXAS CITY – Pilason kag yara sa hilway nga estado ang walo katuig nga lalaki, matapos ini mabungguan sang motorsiklo sa national highway sang Sitio Pamantawan, Barangay Mianay, Ivisan, Capiz.
Ang wala na ginhingadlan nga menor de edad ang residente sang nasambit nga barangay.
Sandig sa impormasyon nga nakuha sang Bombo Radyo sa Ivisan Municipal Police Station, nga samtang ginasubay ni John Rey Jore, 19-anyos, residente sang Brgy. Balarig, sa amu man nga banwa, ang amu nga dalan, sakay sa Bajaj sini nga motorsiklo, sang ginpahayag nga hinali nagtabok ang bata sa karsada.
Nahibaluan nga kaupod sang biktima ang iya magulang nga lalaki nga isa man ka menor de edad, apang wala ini makatabok bangud nadiparahan sini ang nagapadulong nga motorsiklo.
Ginpadangat sa pinakamalapit nga ospital ang bata nga nag-angkon sang menor nga kapilasan sa magkatuhay nga parte sang iya lawas.
Ginkustodiya naman ang driver sang motorsiklo sa kapulisan.
