ROXAS CITY – Dako nga bulig para sa Land Transportation Office kun makapasar ang kapin 87 ka mga personnel sa ginpatigayon nga 2-day deputation training seminar sa Capiz Police Provincial Office.
Ini ang ginpahayag ni LTO-Regional Office 6 Public Information Officer Riza Otayde sang ma-interview sang Bombo Radyo Roxas.
Suno diri nga ang nasambit nga mga personnel nga nagpaidalom sa amo nga paghanas ang makabulig sa pagpanakop sa mga nagalapas sa Land Transportation and Traffic Code ukon Republic Act 4136.
Suno kay Otayde nga kinahanglan nga mapasaran sang mga kapulisan nga nagpaidalom sa seminar ang written kag practical examination agud mangin deputized personnel sila sang LTO kag makapanakop sa mga motorista nga nagalapas sa nasambit nga laye.
Ginklaro naman ni Otayde nga ang mga kapulisan nga indi makapasar sa nasambit nga eksaminasyon ang indi makabig nga deputized personnel kag kinahanglan pa nga ipaidalom liwat sa training.
Ang mga kapulisan nga makapasar diri ang pagahatagan sang ID nga indikasyon nga sila ang mahimo na nga makapanakop sang mga violators.
Ang nasambit nga ID ang balido lamang sa sulod sang anom ka bulan kag kinahanglan nila nga i-renew.
Gindugang pa ni Otayde nga kun nagaduda ang mga motorista nga nagapanakop ang mga kapulisan mahimo nila ini nga usisaon kag pangitaan sang ID nga makapamatuod nga deputized personnel sila sang LTO.
Mahimu naman nga maka-issue sang TOP ukon Temporary Operator’s Permit sa mga motorista nga magalapas sa RA 4136 kag kinahanglan nga gawaron ang ila nga lisensiya sa talatapan sang LTO.
Ginklaro naman ni Otayde nga mahimo nga makapanakop ang mga deputized personnel sang LTO kun Sabado kag Dominggo nga adlaw.
