Gin-athag sang isa ka legal expert nga may gahum ang Kongreso nga maghimo sang layi lakip ang postponement sang barangay and Sangguniang Kabataan elections.
Ini kasunod sang pag-apruba sang House of Representatives sa House Bill No. 10971 nga palawigon sa lima ka tuig ang termino sang mga barangay kag SK officials.
Sa third reading, nakakuha ini sang 211 boto pabor, 13 nagpamatok kag isa ang nag-abstain.
Sa interview sang Bombo Radyo kay Atty. Affle John Leonor sang Integrated Bar of the Philippines–Capiz Chapter, iya ginpahayag nga kinahanglan may lehitimo kag klaro nga rason ang postponement agud indi malapas ang constitutional right sang mga Pilipino nga makaboto.
Suno kay Leonor, kinahanglan timbangon ang gahum sang Kongreso kag ang kinamatarong sang publiko nga indi ini magresulta sa paglapas sa constitutional right sang mga Pilipino nga makapili sang ila nga mangin leader.
Nahibaluan nga isa sa mga rason sa pagpalawig sang termino amo ang pagpasiguro sang continuity sang mga programa kag proyekto sang mga opisyal.
