ROXAS, CITY – Nakakumpiska sang 51 ka loose firearms ang Roxas Component City Police Station bilang pagsuporta sa Project RTT ukon “Restrict, Track, and Turn-In” 3389 sang Police Regional Office 6 (PRO 6) kag Project CAPeace-Tawhayan, program sang Capiz Police Provincial Office (CPPO).
Matandaan nga ini base sa accomplishment report sang Roxas City Police Station sang September 21, 2026. Ini ginpatigayon sa pagpanguna ni Regional Director Police Brigadier General Randulf T. Tuaño sang PRO 6 kag Provincial Director Police Colonel David L. Cachumbo Jr. sang CPPO.
Sa interview sang Bombo Radyo kay Police Lieutenant Colonel Rogelio L Tomagtang Jr., Chief of Police sang Roxas Component City Police Station, iya ginpahayag nga sa 47 ka barangay sang syudad, nagpartisipar ang tanan nga barangay officials, boluntaryo man nga ginsurrender sang mga residente sang Roxas City ang ila ginapanag-iyahan nga armas nga wala sang lisensya ukon expired na, samtang may pila ka barangay nga nakasurrender sang sobra sa isa ka loose firearm.
Suno kay Tomagtang, 50 sa 51 ka armas ang short firearms lakip diri ang 22 homemade 12-gauge shotgun, 20 homemade 38-caliber revolver, 7 homemade 22-caliber revolver, 1 homemade 40-caliber pistol, samtang isa naman ang long firearm nga homemade 22 rifle.
Pahayag pa niya, daku ang kontribusyon sang barangay officials kag mga residente sa pagpatuman sang amo nga mga programa paagi sa boluntaryo nga pagsurrender sang loose firearms.
Sa karon ginapanawagan nga magpadayon sa kooperasyon ang mga barangay officials kag pumuluyo sa syudad bangud mahimo ini nga makatapna sa mga insidente nga may kaangtanan sa paggamit sang armas kag makapabaskog sa peace and order kag public safety sa Roxas City.
