SAN PEDRO, Jamindan, Capiz – Arestado ang isa ka barangay kapitan nga nagapanguna sa pagpasurrender sang loose firearms sa iya barangay, matapos nga nagpatigayon sang search warrant operation batok sa iya ang Criminal Investigation and Detection Group (CIDG) Capiz.
Matandaan nga ginpatigayon ang pag-implementar September 22 sa takna sang 5:20 sang kaagahon.
Ang arrested person amo si alias Ger, 59-anyos, residente kag punong barangay sang Sitio Ilongbukid, Barangay San Pedro, Pontevedra, Capiz.
Sa interview sang Bombo Radyo kay Police Captain Maria Fe T. Umiten, Officer-in-Charge sang Pontevedra Municipal Police Station, iya ginpahayag nga sa 27 ka barangay nga sakop sang banwa sang Pontevedra, Capiz, nanguna si alias “Ger” sa pagpasurrender sang loose firearms nga naglab-ot naman sa 12 ka armas lakip diri ang 7 ka homemade 12-gauge shotguns kag 3 ka 38-caliber revolver, samtang 2 pa ka revolvers ang nakumpiska.
Suno kay Umiten bilang supporta sang municipalidad naghatag sang hagna ang banwa kag ini nakuha sang barangay San Pedro, kag bilang personal niya nga pagkakilala sa incumbent kapitan ini gin laragway niya active nga klase sang opisyal, apang sa pihak nga bahin may yara pa gali nga armas nga ang kapitan nga ginatago
Suno kay Umiten, importante ang programa sang PRO 6 nga Restrict, Track and Turn-In (RTT 3389) kag CAPeace-Tawhayan sang CPPO sa paglikaw sang mga insidente nga may kaangtanan sa paggamit sang armas luthang.
Pahayag pa niya, daku ang bulig sang koordinasyon sang tagsa ka barangay kag Local Government Unit (LGU) sa pagmonitor, pagreport, kag pag-engganyo sa mga nagapanag-iya sang loose firearms nga boluntaryo nga magsurrender sang ila mga armas.
Sa karon, ginpadayon sang kapulisan ang pagpatuman sang mga programa nga nagaluntad sa pagpasurrender sang loose firearms kag pagpalig-on sang peace and order kag public safety sa komunidad.
