Napuhag ang isa ka pamilya matapos ginsulod sang isa ka lalaki ang ila puluy-an sa Barangay Cagay, Roxas City.
Sa interview sang Bombo Radyo kay Barangay Kagawad Isidro Aragon, iya ginpahayag nga nakabaton sila sang report parte sa lalaki nga nagsulod sa isa ka balay sa lugar.
Suno kay Aragon, gilayon nila ini ginpadulungan kag nakita sa CCTV ang amo nga lalaki nga nagsulod sa puluy-an nga wala sang bayo, ginalagas ini sang mga residente apang madasig nga nakapalagyo.
Wala man sang ginreport nga nadula nga kagamitan sa pamilya apang, nagdulot ini sang kahadlok kag trauma sa amo nga insidente.
Nagpanawagan naman natungdan sa publiko nga maghalong kag gilayon magreport sa barangay ukon kapulisan kon may makakita nga kahina-hinala nga mga persona.
