Yara pa sa gihapon sa legal nga proseso ang pinal nga desisyon sang Comelec En Banc kasunod sang pag-affirm sang Comelec Second Division sa ruling sang Regional Trial Court ukon RTC Branch 15 nga nagsiling nga nakompleto na ni President Roxas, Capiz Mayor Receliste “Tanoy” Escolin ang iya tatlo ka termino bilang alkalde.
Sa interview sang Bombo Radyo kay Atty. Wil Arceño, Assistant Regional Director sang Comelec Region 6, iya ginpahayag nga wala pa sang pinal nga resolusyon sa kaso bangud yara pa ini sa proseso sang legal nga pagadesisyon.
Suno kay Arceño, indi ma-consider nga interruption sa termino ni Mayor Escolin ang iya tatlo ka bulan nga suspension bangud nakabalik ini sa gihapon bilang mayor pagkatapos sang suspension.
Ginpahayag man sini nga sa quo warranto case, gina-recognize nga ang isa ka kandidato nakompleto ang proseso kag naproklamar bilang elected public official.
Samtang, plano naman sang kampo ni Escolin nga magpasaka sang motion for reconsideration, gani nagapadayon pa ang legal nga proseso may kaangtanan sa iya eligibility bilang mayor sang President Roxas.
