CAPIZ-Gintugyan sang Gobyerno Probinsyal sang Capiz ang kabug-usan nga 940 ka kilo sang bugas kag 94 ka food packs sa mga mangingisda halin sa Barangay Culasi, Roxas City, sa ginpatigayon nga aktibidad sa Cafeteria sang Capiz Provincial Capitol subong nga adlaw, Oktubre 9, 2026.
Ang paghatag sang bulig natigayon sa idalum sang administrasyon ni Governor Fredenil H. Castro matapos nga nagpalapit ang mga mangingisda sa talatapan sang gobernador sang Oktubre 6 agud magpangayo sang bulig para sa ila mga kinahanglanon.
Ang kada food pack may unod nga 10 ka kilo nga bugas kag mga pagkaon, lakip ang 15 ka delata, noodles kag kape, nga ginapaabot makabulig sa pagpaumpaw sang galastuhan sang mga benepisyaryo sa adlaw-adlaw.
Ang paghatag sang bulig ginpangunahan sang Gobyerno Probinsyal, sa pagpakigbahin sang Task Force Pagdumdum kag Provincial Social Welfare and Development Office (PSWDO).
Paagi sa sini nga programa, ginatinguhaan sang probinsyal nga gobyerno nga makabulig sa mga mangingisda sa pag-atubang sang ila mga panginahanglanon, ilabi na sa tunga sang nagataas nga presyo sang mga balaklon kag krudo nga nagadugang sa ila adlaw-adlaw nga galastuhan.
