Naghulam ang gobyerno sang Pilipinas sang P14.98 billion gikan sa World Bank agud mapasangkad ang pag-angkon sang matinlo nga tubig kag nagakaigo nga sanitation, ilabi na sa mga lugar nga kulang sa serbisyo.
Suno sa Department of Finance ukon DOF, ang loan magagasto sang Accelerated Water and Sanitation Project in Selected Areas nga ipatuman sang Department of Public Works an d Highways kag sang Department of the Interior and Local Government.
Lakip sa mga proyekto nga tukuron amo ang bulk water supply system, septage treatment plant kag mga pasilidad para sa tubig, sanitasyon kag katinlo sa Bohol, Siargao kag Sulu.
Tinutuyo sini nga mapabaskog ang seguridad sa suplay sang tubig, mapaayo ang serbisyo sa sanitasyon kag mabuhinan ang risgo sa palibot tuga sang kakulang sang tubig.
Suno kay Finance Secretary Frederick Go, ang pondo ang makabulig sa pagpabaskog sang seguridad sa tubig kag mapasanyog ang mga serbisyo may kaangtanan sa matinlo nga tubig.
Ginalauman man nga makabulig ang nasambit nga proyekto sa pagpreparar sang pungsod sa posible epekto sang super El Niño.
