CAPIZ-Masobra 100 ka boluntaryo ang nagbinuligay sa pagkolekta sang kabug-usan nga 485.5 kilogramo nga basura sa ginpatigayon nga coastal clean-up sang Oktubre 9, 2026, sa Sitio Guibungan, Barangay Lonoy, banwa sang Sapi-an, Capiz, agud maprotektahan ang baybayon kag palibot sang probinsya.
Ang aktibidad ginpangunahan sang Capiz Provincial Government paagi sa Capiz Provincial Environment and Natural Resources Office (CaPENRO), sa pagpakig-angot sa Local Government Unit (LGU) sang Sapi-an.
Nagpartisipar sa aktibidad ang mga opisyal sang Barangay Lonoy, mga Barangay Health Worker kag tanod, mga benepisyaryo sang 4Ps, mga manunudlo kag estudyante sang Guibungan Primary School, kag mga personnel halin sa Philippine National Police (PNP), Bureau of Fire Protection (BFP), Philippine Coast Guard, Municipal Agriculture Office, Municipal Environment and Natural Resources Office (MENRO), kag CaPENRO.
Ang pagtililipon sang nagkalain-lain nga sektor nagapakita sang importansya sang pagbinuligay sang komunidad kag mga ahensya sang gobyerno sa pag-atubang sang problema sa basura kag pag-amlig sang kadagatan.
Ginapabug-atan man sang aktibidad ang importansya sang padayon nga pagpakigbahin sang komunidad agud mapabilin nga matinlo, hilway sa peligro, kag mapadayon ang kaayuhan sang aton mga baybayon para sa masunod nga mga henerasyon.
