Magapakigbahin ang grupo sang Pi Gamma Phi-Gamma Sigma sa paghiwat sang Dugong Bombo 2026 agud makabulig sa pagtipon sang dugo para sa mga pasyente nga nagakinahanglan sini.
Sa interview sang Bombo Radyo kay Jayv Astorias, Provincial President sang Pi Gamma Phi-Gamma Sigma, iya ginpahayag nga nangin tinuig na nga buluhaton sang ila grupo ang pagpartisipar sa nagkalain-lain nga bloodletting activities, ilabi na sa Dugong Bombo.
Suno kay Astorias, daku ang papel sang pagdonar sang dugo sa pagluwas sang kabuhi, bangud madamo nga pasyente ang nagakinahanglan sang blood transfusion kada adlaw.
Pahayag pa sini, bisan sa simple lamang ang pagdonar sang dugo, mahimo ini mangin daku nga bulig sa mga tawo nga nagapakigbato sa balatian ukon yara sa emerhensya nga sitwasyon.
Dugang pa sang natungdan, ang ila pagpakigbahin sa Dugong Bombo 2026 isa ka oportunidad nga mapakita ang ila pagpalangga sa isigkatawo kag mangin instrumento sa pagluwas sang kabuhi paagi sa boluntaryo nga pagdonar sang dugo.
Gin-imbitar man sang grupo ang kaangay nila nga fraternity group nga mag-upod kag magdonar sang dugo para sa Dugong Bombo 2026.
