Nangin isa ka bugal sang Capiz si Klenton Sibelina, tumandok sang Panay, Capiz, matapos makuha sini ang Top 1 sa Dakilang Manggagawang Pilipino sa UAE 2026.
Sa interview sang Bombo Radyo kay Sibelina, iya ginpahayag nga daku ang iya kalipay kag pagpasalamat sang nalakip ang iya pangalan sa mga nominado para sa nasambit nga pagkilala.
Suno kay Sibelina, daku na nga kadalag-an para sa iya ang pagkasulod sa Top 20, apang wala niya ginpaabot nga magapadayon pa ang iya pangalan sa Top 10 tubtob nga nangin Top 1, nga para sa iya isa ka pagpakita sang plano sang Ginoo sa iya kabuhi.
Nahibakuan nga antes mangin isa ka lider sa sektor sang edukasyon, nag-umpisa si Sibelina bilang waiter kag sales assistant sang nag-abroad ini siyam ka tuig na ang nagligad, apang wala gid niya ginbayaan ang iya handum nga mangin manunudlo.
Nagserbisyo ini sa nagkalain-lain nga institusyon sang edukasyon sa Middle East, kun sa diin nakabaton ini sang Principal’s Award, ang pinakamataas nga pagkilala sang iya eskwelahan, antes ginpromote sa iya karon nga posisyon.
Ang iya kadalag-an nagaserbe nga inspirasyon sa mga kasimanwa, ilabi na sa mga Pilipino nga nagapangabudlay sa iban nga pungsod, nga ang pagkamadasigon, pagkamapinadayunon kag pagtuo sa kaugalingon makabulig sa pagkab-ot sang mga handum sa kabuhi.
