Lusot na sa Senate Committee on Finance ang P7.7-billion nga budget proposal sang Senado para sa Fiscal Year 2027, kaupod ang Senate Electoral Tribunal (SET) kag Commission on Appointments (CA) funding proposal.
Sa budget presentation, ginpresentar ni Senate Secretary Renato Bantug Jr ang funding proposal sang Senado, nga nagatuyo sa pagmentinar sang episyente nga legal nga serbisyo, pagpabaskog sang mga sistema sang institusyon, pagpasanyog sang digital transformation, kag pagsiguro sang responsable nga paggamit sang pundo sang publiko.
Suno kay Bantug, P187.5 million ukon 2.5% nga mas mataas ang ginaduso nga budget kun ipaanggid sa net budget sang Senado sang 2026, apang mas manubo ang P863 million ukon 10.1% sangsa 2026 General Appropriations Act (GAA).
Sa report ni Bantug, ang Senado nakarekord sang 68 session days sang 2025, kon sa diin 1,694 ka mga hagna kag 313 ka mga resolusyon ang gin-file. Sa kabilugan, 197 ka mga hagna ang nangin Republic Acts sadto nga tuig, lakip ang mga tikang para sa reporma sang gobyerno, fiscal autonomy sang hudikatura, digital governance, pagpasangkad sang elecommunications connectivity, career progression sang mga manunudlo kag mga lider sang eskwelahan, kag reporma sang pag-angkon right-of-way acquisition.
Halin Enero tubtob Hunyo 2026, ang Senado naghiwat sang dugang nga 33 ka adlaw nga sesyon kag nakarekord sang 653 ka mga hagna kag 249 ka mga resolusyon. Base sa datos tubtob Oktubre 15, 2026, 13 ka mga hagna ang nangin Republic Acts, samtang 16 ang ginpadala para sa pag-aprubar sang Presidente, anum ang pending sa Conference Committee, 38 ang na-aprubahan sa ikatlo kag katapusan nga pagbasa, kag 19 ang pending sa ikaduha nga pagbasa.
