Nagsugod na sa pagbakal ang National Food Authority (NFA) Capiz sang palay nga ₱29 kada kilo, samtang ginapalawig ang operasyon sang mga buying station tubtob Sabado kag Dominggo agud maserbisyuhan ang mas madamo nga mangunguma sa tunga sang anihan.
Sa interview sang Bombo Radyo Roxas kay Mr. Joemer Fajartin, Branch Manager sang NFA Capiz, iya ginpahayag nga nagabag-o kada semana ang buying price base sa pag-canvas sang nagapangibabaw nga presyo sang palay sa lokal nga merkado. Ang aktuwal nga bayad nagadepende man sa kalidad kag klasipikasyon sang palay.
Suno kay Fajartin, may apat ka klasipikasyon sang palay nga may nagkalain-lain nga presyo: ang PD1A — ₱29 kada kilo; PD2A — ₱27.73 kada kilo; PD1B — ₱25 kada kilo; kag PD2B — ₱29 kada kilo.
Kinahanglan nga rehistrado sa Registry System for Basic Sectors in Agriculture (RSBSA) ang mga mangunguma agud makabaligya sa NFA. Ang wala pa makarehistro mahimo gihapon makadeliver bilang walk-in farmer paagi sa pagkompleto sang Farmers Information Sheet.
May maximum limit man nga 200 ka sako kada mangunguma, basta mapamatud-an nga ang iya uma may kapasidad nga makaproduce sang amo nga kadamuon sang palay.
Sa subong, magabukas ang mga buying station sang NFA sa Bolo, Sigma kag Dumalag, Capiz, halin Lunes tubtob Biyernes, alas-8 sang aga tubtob alas-5 sang hapon.
